دوای ئەوەی بەهۆی ئاگرکەوتنەوە لە نەخۆشخانەی ژنان و منداڵبوونی پارێزگای دیوانییە چوار منداڵی کۆرپە گیانیان لەدەستدا، بەڕێوەبەری نەخۆشخانەکە دوورخرایەوە و داوای لێکۆڵینەوە دەکرێت.
عەزیز شەریف، نوێنەری پارێزگای دیوانییە، لە بەیاننامەیەکدا رایگەیاند، پێویستە لێپرسینەوە لەسەرجەم لایەنە کەمتەرخەمەکان بکرێت بەتایبەت بەرپرسانی نەخۆشخانەکە، هەروەها پێویستە کەسوکاری قوربانییان قەرەبوو بکرێنەوە و گرەنتی دووبارە نەبوونەوەی ئەو کارەساتانە بکرێت.
شەوی رابردوو، لە نەخۆشخانەی ژنان و منداڵبوونی پارێزگای دیوانییە ئاگرکەوتەوە و بەهۆیەوە چوار منداڵی کۆرپە گیانیان لەدەستدا، سەرچاوەکانی میدیا هۆکاری ئاگرەکەیان بۆ شۆرتی کارەبا گەڕاندەوە.
دوای رووداوەکە وەزیری تەندروستیی عێراق گەیشتە شوێنی رووداوەکە و بڕیاری دوورخستنەوەی بەڕێوەبەری نەخۆشخانەکە دەرکرا.
