دوابەدوای ئەوەی وەزارەتی پەروەردە رۆژی ٧ی ئەم مانگە نوسراوێکی بڵاوکردەوە و دواتریش بەڕێوەبەرایەتییەکانی پەروەردە داوای کردنەوەی دەرگای خوێندنگەکانیان کرد و داوای گەڕانەوەی مامۆستایانیان کرد، ئەمڕۆ زۆرینەی خوێندنگەکان کرانەوە، بەڵام بەشێک لە مامۆستایان دەستیان بە دەوام نەکردووەتەوە و دیار نییە پابەند دەبن یاخود نا.
ئەمڕۆ سیشەممە، بە گوێرەی ساڵنامەی خوێندن کە لەلایەن پەروەردەی گشتی سلێمانییەوە بڵاوکرایەوە دەبوایە یەکەم رۆژی دەستپێکردنەوەی خوێندن بێت و خوێندنگەکان دەوامیان تێدا بکرێت، بەڵام هەموو مامۆستایان نەچوونەتەوە بۆ خوێندنگەکان و لە هەندێک خوێندنگە چەند مامۆستایەک چوونەتەوە بەمەبەستی پەیوەندیکردنەوە.
دوای تێپەڕبوونی وەرزێکی خوێندن بە بایکۆت و نەبوونی دەوام، مامۆستایانی ناڕازی سنوری سلێمانی و راپەڕین و گەرمیان و هەڵەبجە لەماوەی رابردوو داوای جێبەجێکردنی 5 خاڵی سەرەکییان لە حکومەت کردبوو، وەزارەتی پەروەردە لە رۆژی ٧ی ئەم مانگە نوسراوێکی بڵاوکردەوە و تێیدا ئاماژەی بەوەکرد، پاش گفتوگۆكردن لەگەڵ ئەنجومەنی وەزیران، رەزامەندی هەیە كە پاش هەمواركردنەوەی یاسای بودجەی فیدراڵی و ناردنی شایستە داراییەكانی هەرێمی كوردستان:
1-پلە بەرزكردنەوە لەچوارچێوەی یاسا بەركارەكان دەستپێدەكات.
2-بەگرێبەستكردنی مامۆستایانی وانەبێژی دانەمەزراو بەگوێرەی رێنماییەكانی وەزارەتی دارایی و ئابوری، بکرێت.
دواتریش ئەم نوسراوە کاردانەوەی دروستکرد و مامۆستایانی ناڕازی نوسراوەکەیان رەتکردەوە و وتیان کە بایکۆت ناشکێنن و ناگەڕێنەوە بۆ خوێندنگەکان تا ئەو کاتەی حکومەت بە روونی وەڵامی داواکارییەکانیان نەداتەوە.
بەڕێوەبەرایەتییە گشتییەکانی پەروەردە لە سنورەکانی سلێمانی و راپەڕین و گەرمیان و هەڵەبجە نوسراویان کرد و داوای کردنەوەی دەرگای خوێندنگەکانیان کرد و داوای چوونەوەی مامۆستایانیان کرد بۆ خوێندنگەکان.
لەلایەکی دیکەشەوە، هەڤاڵ ئەبوبەکر پارێزگاری سلێمانی رایگەیاند، وەڵامی داواکاری مامۆستایان لە سلێمانی نییە و داواکاری مامۆستایان لە هەولێر و بەغداد دەبێت جێبەجێ بکرێت، بەڵام راگرتنی پڕۆسەی خوێندن زیانی هەبووە لەسەر شارەکە و داوای لە مامۆستایان و فەرمانبەران کرد لەبەر بەرژەوەندی خوێندكاران و قوتابیان دەرگای قوتابخانەكان بكەنەوە بۆ ئەوەی بێبەش نەبن لە خوێندنی ئەمساڵ و جەختیشی کردەوە، بەردەوام دەبن لە پشتیوانی داوا رەواكانیان.
