نرخی هه‌ر كاتژمێرێك بۆ یه‌ك ئه‌مپێر کارەبای موەلیدە بۆ مانگی کانوونی یەکەم 44 دینارە،به‌مه‌ش نرخی یه‌ك ئه‌مپێڕ كاره‌بای موه‌لیده‌ی ئه‌هلی گه‌ڕه‌كه‌كان له ناو شاری سلێمانی له‌نێوان 13 هەزار و 500 دینار بۆ 14 هەزار و 500 دیناردا دەبێت.
بەڕێوەبەرایەتیی گشتیی کارەبای سلێمانی بڵاویکردەوە، ئه‌مڕۆ چوارشه‌ممه لیژنه‌ی دیاریكردنی نرخی موه‌لیده ئه‌هلییه‌كان کۆبووەوە و به‌پێی نرخی سووته‌مه‌نی کە له بازاڕه‌كاندا نرخی هه‌ر كاتژمێرێك بۆ یه‌ك ئه‌مپێر (44) دینارە، نرخی یه‌ك ئه‌مپێڕ كاره‌بای موه‌لیده‌ی ئه‌هلی گه‌ڕه‌كه‌كان له ناوشاری سلێمانی له‌نێوان 13 هەزار و 500 دینار بۆ 14 هەزار و 500 دیناردا دیاریکرا، به‌هۆی جیاوازی كارکردنیان نرخی ئه‌مپێرێك له گه‌ڕه‌كێك بۆ گه‌ڕه‌كێكی دیكه جیاواز ده‌بێت.
ئاشکراشیکرد، ئه‌و شوێنانه‌ی بەرنامەى کارکردنى موەلیدەکانیان لە 7:00 ى بەیانى بۆ 1:00 ى شەوە، نرخى ئەمپێریان لەنێوان 17 بۆ 18 هەزار دیناره.
ئەو موەلیدانەش کە کارکردنیان 24 کاتژمێرییە نرخى ئەمپێریان 21 بۆ 22 هەزار و 250 دیناردا دەبێت.
ئاشکراشیکرد، ، خشته‌ی كارپێكردنی موه‌لیده بۆ ئەم مانگە گۆڕانکارى تێدادەکرێت و موەلیدەکان لەنێوان 1:00 ى پاشنیوەڕۆ تا 1:00 ى شەو ئەگەر کارەباى نیشتیمانى کوژایەوە کاردەکەن، بەیانیانیش لەکاتژمێر 6:30 تا 8:00ى بەیانى کاردەکەن, رۆژانى هەینى و پشووە فەرمییەکان بەیانیان کارناکەن لەبرى ئەوە کاتژمێر 11:00 ى پێشنیوەڕۆ کاردەکەن.
