پەرلەمانتارێكی كورد داوادەكات بۆ پرسە چارەنووسسازەكانی داهاتوو گفتوگۆی نێوان لایەنەكان دەستپێبكاتەوە.
كاروان یاروەیس، ئەندامی ئەنجومەنی نوێنەرانی عێراق رایگەیاند، چەند رۆژێكی دیكە ئەنجومەنی نوێنەران کۆتایی بە پشووی وەرزی یاسادانانی دەهێنێت و وەرزی تازەی یاسادانانی دەستپێیدەکات.
دەشڵێت، هەڵبژاردنی سەرۆکی ئەنجومەنی نوێنەران، هەمواری یاسای بودجە و چارەسەری قەیرانی مووچەی هەرێم، یاسای دادگای فیدراڵی، یاسای نەوت و غاز و پێکهێنانی حکومەتی خۆجێتی پارێزگاکان بەتایبەتی کەرکوک لە ئەرکە هەرە گرنگەکانن.
لە وەرزەکانی رابردووی یاسادانانی ئەنجومەنی نوێنەراندا، كورد بەهۆی پەرتەوازەییەوە لە هەڵبژاردنی سەرۆکایەتیی ئەنجومەنی نوێنەران و تێپەڕاندنی یاسای ئاسایشی خۆراک و هەمواری یاسای هەڵبژاردن و یاسای بودجە و کۆمەڵێ پرسی تردا کورتی هێنا، یاروەیس وادەڵێت.
ئەوەش دەخاتەڕوو، کورد بۆ ئەوەی لەبەرامبەر ئەو ئەرکانە، بەتایبەت گوزەرانی خەڵک لەهەرێم كە لەوپەری خراپیدایە و، هەستیاری دۆخ و هەلومەرجی عێراق و ناوچەکە کورت نەهێنێ، پێویستە خۆی کۆبکاتەوە، بۆ ئەمەش باشتروایە گفتوگۆی یەکێتی و پارتی و لایەنە کوردستانیەکان دەستپێیبکاتەوە و بڕیاری جددی گرنگ و چارەنووسساز بدەن.
