گەشتوگوزاری سلێمانی دەڵێت، تا ئێستا 35 هەزار گەشتیار روویان لە سلێمانی کردووە و پێشینی دەکرێت ژمارەکە بۆ 70 هەزار گەشتیار بەرزببێتەوە.
ئارام شوان، وتەبێژی بەڕێوەبەرایەتیی گشتیی گەشتوگوزاری سلێمانی بە تۆڕی میدیایی ئێستای رایگەیاند، بەبۆنەی سەری ساڵی نوێی زاینییەوە تا ئێستا 35 هەزار گەشتیار روویان لە سلێمانی کردووە، 90٪ی ئەو گەشتیارانەش خەڵکی ناوچەکانی ناوەڕاست و باشووری عێراقن.
باسی لەوەشكرد، ئامادەکارییە پێویستەکان بۆ پێشوازی لە گەشتیاران ئەنجامدراون بە دروستکردنی چەندین لیژنە بۆ پێشوازی و بەدواداچوون و سبەینێش دەست بە رازاندنەوەی شەقامی سالم دەکرێت.
وتەبێژەکەی گەشتوگوزار ئەوەشی ئاشکراکرد، پێشبینی زیادبوونی ژمارەی گەشتیاران دەکەن بۆ نزیكەی 70 هەزار، بەراورد بە ساڵی رابردوو کە 50 هەزار گەشتیار روویان لە سلێمانی كردبوو.
