بەڕێوەبەری گشتیی بەنداوەکان رایگەیاند، ئەو بارانەی چەند رۆژی رابردوو لە هەرێم باریوە، کاریگەری لەسەر بەنداوە گەورەکان نەبووە، بەڵام بەنداوە بچووکەکان زۆرینەیان پڕبوون.
رەحمان خانی بەڕێوەبەری گشتیی بەنداوەکان بە تۆڕی میدیایی ئێستای راگەیاند، ئەو شەپۆلی بارانبارینەی چەند رۆژێکە هەرێمی کورستانی گرتووەتەوە کاریگەرییەکی ئەوتۆی لەسەر ئاوی بەنداوە گەورەکان نەبووە، لە بەنداوی دوکان داهاتی ئاو زیادینەکردووە.
ئاماژەی بەوەشکرد، ئاستی ئاوی بەنداوی دەربەندیخان بە شێوەیەکی کەم زیادیکردووە، بەڵام ئەو زیادکردنەش کاتییە.
وتیشی، بەنداوە بچوکەکانی وەک دێوانە، ئاوەسپی، کفری، حەسەن کەنۆش سەررێژبوون، پۆندەکانیش بەهەمان شێوە بە کاتێکی کەم پڕبوون.
رەحمان خانی جەختیشیکردەوە، ئەمساڵ بەراورد بە ساڵی پار لە هەمان کاتدا، بەنداوی دوکان هەشت مەتر و بەنداوی دەربەندیخان شەش مەتر ئاویان زیاتر تێدایە.
