بڕیارە سبەی سێی یەکی کانوونی دووەم، دەوامی فەرمی لە وەزارەتەکانی حکومەتی هەرێم دەستپێبکاتەوە و ئەو فەرمانگانەشی لە هەرێم سەربە حکومەتی عێراقین دەوام دەکەن.
بەیان جەمال، بەرپرسی بەشی ڕاگەیاندن لە بەڕێوبەرایەتی پاسۆرتی سلێمانی بە تۆڕی میدیایی ئێستای ڕاگەیاند، “لەلایەن حکومەتی هەرێمی کوردستانیشەوە ئاگادار کراوینەتەوە کە سبەی سێی یەکی کانوونی دووەم، دەوامی فەرمی دەستپێبکەینەوە”.
لە هەرێمی کوردستان هەندێک لە فەرمانگەکان وەک ڕەگەزنامە و باری شارستانی و پاسپۆرت و نشینگە و بەنداوەکان سەربە حکومەتی عێراقین، بەڵام سبەی ڕۆژی یەکشەممە لە عێراق درێژکراوەی پشوی سەریساڵە و ئەو فەرمانگانە پابەندن بە فەرمانی حکومەتی هەرێمەوە بۆ دەوامکردنی سبەی.
حکومەتی هەرێمی کوردستان لە 27 ی کانونی یەکەمەوە تا ڕۆژی سێی کانوونی دووەم، پشوی ڕاگەیاند و بۆ ماوەی هەفتەیەک پشوی فەرمی بوو لە فەرمانگەکانی حکومەتی هەرێمدا.
