لە دوێنێوە دوو جوتیاری دانیشتووی گوندی تۆپزاوا دەستگیرکراون هەرچەندە بڕیاربوو ئەمڕۆ ئازادبکرێن، بەڵام دادگای کەرکوک رەتیکردەوە ئازادیان بکات.
پەیامنێری تۆڕی میدیایی ئێستا گواستییەوە، “لەدوێنیوەساتع ناسیح نوێنەری جوتیارانی گوندی تۆپزاوە و سۆران نازم دانیشتووی گوندەکە لەباشووری پارێزگای کەرکوک دەستبەسەر کراون و ئەمڕۆ یەکەم دانیشتنی دادگاییکردنیان بەڕێوەچوو”.
ئاماژەی بەوەشکرد، “ئەو دوو جوتیارە لەسەر سکاڵای فیرقەی 11 ی سوپای عێراقی لەلایەن بنکەی پۆلیسی ناحیەی یایچیەوە بانگهێشتکراون لەدوای چوونیان بۆ بنکەکە لەلایەن پۆلیسی بنکەکەوە دەستبەسەر کراون”.
پارێزەرێک لە دادگای کەرکوک بەتۆڕی میدیایی ئێستای راگەیاند، “دوو سکاڵا لەلایەن فرقەی 19 ی سوپای عێراق، لەسەر ئەو دوو جوتیارە تۆمار کراوە، یەکێکیان ماددەی 229 سوکایەتیکردن بە فەرمانبەری دەوڵەت لە کاتی ئەرکدا و هەروەها 210 هاندان بۆ گردبوونە و خۆپیشاندان”.
بڕیار بوو ئەمڕۆ دوو جوتیارەکە بە بارمتەی یاسایی ئازادبکرێن، بەڵام لەلایەن دادگای کەرکوکەوە داواکەیان رەتکرایەوە.
