بافڵ جەلال تاڵەبانی، سەرۆكی یەكێتیی نیشتمانیی كوردستان لەگەڵ محەمەد شیاع سودانی، سەرۆك وەزیرانی عێراق لە بەغداد كۆبووەوە.
لە كۆبوونەوەكەدا دۆخی گشتیی وڵات و هەوڵەكانی حكومەت بۆ پێشكەشكردنی خزمەتگوزاریی زیاتر گفتوگۆی لەبارەوەكرا و جەخت لە هەماهەنگی و هاریكاریی نێوان هێز و لایەنە سیاسییەكان كرایەوە لەپێناو چارەسەركردنی كێشەكان و پاراستنی سەقامگیریی لە ناوچەكە.
لە درێژەی كۆبوونەوەكەدا سەرۆك بافڵ جەلال تاڵەبانی ئاماژەی بە هەوڵەكانی شاندی هەرێم كرد بۆ گەیشتن بە رێككەوتنێكی نیشتمانی لەگەڵ بەغداد و روونیكردەوە، گەڕانەوە بۆ دەستوور و هاوبەشیی راستەقینە، فاكتەری سەرەكیی چارەسەركردنی كێشەكانە.
وتیشی، “ژیان و گوزەرانی خەڵك دەبێت كاری لەپێشینەی حكومەت بێت و هەموولایەكیش هاوكار و هەماهەنگبن لەو پێناوەدا”.
لەبارەی پێشهاتە ئەمنییەكانی ناوچەكە و لێكەوتەكانییەوە، سەرۆك بافڵ سیاسەتی یەكێتیی خستەڕوو و رایگەیاند، “ناوچەكە بە قۆناغێكی هەستیاردا تێدەپەڕێت، ئەركی هەموولایەكە بەرپرسیارانە مامەڵە بكەن و وڵات لە هەموو ئەگەرێكی نەخوازراو بپارێزن”.
