کونسوڵی ئێران رایدەگەیەنێت، لەڕێی پەیوەندییەكانیانەوە کاردەکەن بۆ چارەسەری کێشەکانی نێوان هەرێم و بەغداد لەسەر بودجە و مووچە.
نەسروڵڵا رەشنوودی، کونسوڵی گشتیی کۆماری ئیسلامی ئێران لە هەولێر رایگەیاند، توانا و پەیوەندییەکانی خۆمان بەکاردەهێنین بۆ ئەوەی کێشەکانی هەرێم و بەغداد لەسەر پرسی بودجە و مووچە بەزووترین کات چارەسەربکرێن.
ئەو وتەیەی كونسوڵی ئێران پاش سەردانكردنی بۆ وەزارەتی دارایی و ئابوریی هەرێم و كۆبوونەوەی بوو لەگەڵ ئاوات جەناب نوری وەزیری دارایی و ئابوری.
بەپێی راگەیەندراوێكی وەزارەتەكە، لە كۆبوونەوەی نێوانیان وەزیری دارایی کورتەیەکی لەسەر دوایین هەنگاو و گفتوگاکانی نێوان هەرێم و بەغداد لە سەر پرسی بودجە و مووچە بۆ شاندی میوان خستەڕوو و ئاماژەی بەوە کرد، هەوڵەکانیان بەردەوامە بە ئاڕاستەی هەموارکردنەوەی یاسای بودجەی عێراق بەو هیوایەی بتوانن بۆ ساڵی داهاتوو پرسی مووچەی فەرمانبەران لە هەموو کێشە و ململانێیەک دووربخەنەوە و بەیەک پێوانە مامەڵە لەگەڵ مووچەخۆرانی هەرێم وەک تێکڕای مووچەخۆرانی پارێزگاکانی دیكەی عێراق بکرێت.
هاوكات داواشی لە کونسوڵی گشتیی ئێران کرد لە رێی پەیوەندییەکانیانەوە هاوکاربن بۆ چارەسەی کێشەکان.
