بافڵ جەلال تاڵەبانی، سەرۆكی یەكێتیی نیشتمانیی كوردستان لە دەباشان چاویكەوت بە ئەفشین قادرزادە، كورتەباڵاترین پیاوی جیهان.
لە دیدارێكدا كە شاناز ئیبراهیم ئەحمەد، سەركەوت زەكی ئەندامانی مەكتەبی سیاسی و سەركەوت حەسەن، ئەندامی سەركردایەتی و عومەر جەبار، سەرۆكی گشتیی كۆمەڵەی كورتەباڵاكانی كوردستان ئامادەبوون، سەرۆك بافڵ جەلال تاڵەبانی بە گەرمی بەخێرهاتنی ئەفشین قادرزادەی كرد بۆ سلێمانی و رایگەیاند، “بە ئەوپەڕی پێزانینەوە لە پێگە و توانای كورتەباڵاكان دەڕوانین و ئێوە رۆڵێكی ئەرێنی و كاریگەر لە بوارە جیاوازەكانی ژیاندا دەگێڕن”.
لە درێژەی دیدارەكەدا سەرۆك بافڵ وتیشی، “یەكێتیی نیشتمانیی كوردستان بە هەموو شێوەیەك پشتگیریی ماف و داواكارییە رەواكانی كورتەباڵا و خاوەنپێداویستییە تایبەتەكان دەكات و باوەڕی تەواومان بە یاسایەكی سەردەمی هەیە كە پارێزەری مافەكانیان بێت و وتیشی، یەكێتی پێشوازی و پشتگیریی لە هەر هەنگاوێكیش دەكات كە ئامانجەكەی خزمەتكردنی ئەو چینە گرنگەی كۆمەڵگە بێت و هەوڵ بۆ دەستەبەركردنی ژیانێكی شایستەتر بدات بۆیان.
