بەیانی ئەمڕۆ لەگەڵ بەخەبەرهاتنی هاوڵاتییانی شاری بەغداد سەرسامبوون بە بەرزبوونەوەی رێژەی ئاوی رووباری دیجلە و گۆڕانی رەنگەکەی بە شێوەیەکی لەناکاو.
میدیا عێراقییەکان بڵاویانکردەوە، بەیانی ئەمڕۆ رووباری دیجلە لە شاری بەغداد بەرزبوونەوەی ئاوەکەی بەخۆیەوە بینیوە و رەنگەکەی بۆ رەنگی قوڕولیتە گۆڕاوە.
ئاماژەیان بەوەشکرد، بەرزبوونەوەی رێژەی ئاوەکە بەهۆی بەردانەوەی بەنداوی سامەرابوو لەدوای ئەو شەپۆلی بارانبارینەی عێراقی گرتەوە.
ماوەی چەند ساڵێکە ئاوی رووباری دیجلە و فوڕات بەشێوەیەکی بەرچاو لە خاکی عێراقدا کەمیکردووە بەهۆی ئەو بەنداوانەی لەلایەن تورکیا و ئێرانەوە دروستکراون.
پێشبینی دەکرێت تا ساڵی 2040 عێراق شتێکی نەمێنێت بەناوی رووباری دیجلە و فورات.
