رێکخراوی نەتەوە یەکگرتووەکان هۆشداری لە وشکبوونی زۆنگاوەکانی عێراق دەدات و بە خراپترین ئاستی وشکبوون لە ماوەی 40 ساڵی رابردوودا هەژماری کردووە.
رێکخراوی خۆراک و کشتوکاڵی سەر بە نەتەوە یەکگرتووەکان (فاو) لە نوێترین راپۆرتیدا بڵاویکردووەتەوە، “%70 ی زۆنگاوەکانی عێراق وشکیان کردووە، ئەمەش خراپترین ئاستە لە ماوەی چل ساڵی رابردوودا”.
رێکخراوەکە عێراقی بە یەکێک لە وڵاتە وشکەکان هەژمارکردووە، ئاشکرایکردووە، عێراق یەکێکە لەو وڵاتانەی زۆرترین کاریگەری گۆڕانکاری ئاو و هەوای بەسەرەوەیە و ئەمە چوارەمین ساڵە لەسەر یەک رووبەڕووی شەپۆلی وشکەساڵی دەبێتەوە.
وشکبوونەوەی ئاوی هۆرەکان کاریگەری گەورەی لەسەر کەمبوونەوەی سامانی ئاژەڵ بە تایبەت گامێش و ماسی کردووە بەشێک لە گوندنشینان ناچاربوون ناوچەکانیان چۆڵبکەن کە ئەمەش کاریگەری لەسەر دیمۆگرافیای ناوچەکە دەبێت.
لەگەڵ بەرزبوونەوەی پلەی گەرما دیاردەی بەهەڵمبوونی ئاوی هەردوو رووباری دیجلە و فورات زیادیکردووە و ئەمەش کاریگەری لەسەر بەرزبوونەوەی ئاستی خوێ کردووە لە ناوچەکەدا.
