هەوكردنی جگەر لە جۆری (C) نەخۆشییەكە چارەسەری هەیە، بەڵام زۆركەس نازانن كە تووشی هاتوون، ئەمەش وادەكات نەخۆشییەكە بگاتە قۆناغی مەترسیدار، وەك شێرپەنجە و پەككەوتنی جگەر، تا دەگاتە گیانلەدەستدان ئەگەر چارەسەر نەكرێت.
ڤایرۆسی هۆكاری ئەو نەخۆشییە لەڕێی بەركەوتن بە خوێنی كەسی تووشبووی ڤایرۆسەكە دەگوازرێتەوە، بەپێی شارەزایان بەكارهێنانی فڵچەی ددان و شفرەی ریش تاشین، یەكێك لە هۆكارەكانی گواستنەوەی ڤایرۆسەكەیە.
هەوكردنی جگەر لە جۆری (C) نەخۆشییەكی ڤایرۆسییە دەبێتەهۆی هەڵاوسانی جگەر، كەمجار نەخۆشییەكە نیشانەی هەیە، لە هەندێك حاڵەتدا تووشبوو تا و هەستكردن بە ماندووێتی تیادەردەكەوێت، جگەلە لەدەستدانی حەزی خواردن، دڵتێكهەڵاتن، ئازاری سك و چەند نیشانەیەكی دیكە.
درەنگ چارەسەركردنی نەخۆشییەكە دەبێتەهۆی لەناوچوونی جگەر، بەڵام پێزانینی لەكاتی زوودا چارەسەری بە بەكارهێنانی دەرمانی دژە ڤایرۆس دەكرێت.
شارەزایان هۆشداریدەدات لە بەكارهێنانی شفرەی ریشتاشین یان فڵچەی ددان، یاخود ئەنجامدانی نەشتەرگەریی پزیشكی یان جوانكار، بەتایبەت لەو وڵاتانەی رێژەی تووشبوون بە نەخۆشییەكەی تیایدا زۆرە.
بەپێی هەڵسەنگاندنی رێكخراوی تەندروستیی جیهانی نزیكەی 58 ملیۆن كەس تووشبووی نەخۆشییەكەن، ساڵانەش ژمارەكە بە نزیكەی 1.5 ملیۆن زیاددەكات.
