قوباد تاڵەبانی جێگری سەرۆك وەزیران پێشوازیكرد لە شاندێكی باڵای سەربازیی بەریتانیا بە سەرۆكایەتیی مارشاڵ سامی سامپسۆن، گەورە راوێژكاری بەرگریی بەریتانیا لە رۆژهەڵاتی ناوەڕاست و باكووری ئەفریقا و لە كۆبوونەوەی نێوانیاندا چەند پرسی جێگەی بایەخی هەردوولا تاوتوێكران.
لە تەوەرێكی كۆبوونەوەكەدا كە رۆژی چوارشەمە، لە هەولێر بەڕێوەچوو و كونسوڵی گشتیی بەریتانیاش بە وەكالەت ئامادەیبوو، باسی دۆخی ناوخۆی هەرێم و پڕۆسەی ریفۆرم لە وەزارەتی پێشمەرگە كرا و جێگری سەرۆك وەزیران رایگەیاند، “لێكتێگەیشتنی باش دروستبووە بۆ چارەسەركردنی كێشەكان و كۆبوونەوەكانی ئەم دواییەی نێوان هەردوو لایەنی یەكێتیی نیشتمانی كوردستان و پارتی دیموكراتی كوردستان ئەرێنی بوون”.
ئاماژەی بەوەشدا هەنگاوەكان بە ئاراستەی چارەسەركردنی كێشەكانی ناو وەزارەتی پێشمەرگەن و گەشبینین بەم نزیكانە بە تەواوی كێشەكانی وەزارەت بە هاوكاری و پشتیوانی هەموو لایەك چارەسەربكرێن و ئەمەش رەوتی چاكسازییەكان لە هێزەكانی پێشمەرگە خێراتردەكات.
لەمبارەیەوە شاندی باڵای سەربازیی بەریتانیا پشتگیری خۆیان بۆ هەرێمی كوردستان و بە تایبەتیش بۆ بەردەوامیی چاكسازییەكانی وەزارەتی پێشمەرگە دووپاتكردەوە.
لە بەشێكی دیكەی كۆبوونەوەكەدا باسی دۆخی ئەمنیی ناوچەكە و عێراق و هەرێمی كوردستان كرا و هەردوولا جەختیان كردەوە كە پێویستە حكومەت و لایەنە عێراقییەكان هەوڵەكانیان چڕبكەنەوە بۆ رێگریكردن لە هەرچەشنە هەنگاو و جووڵەیەك كە ببێتە هۆی بارگرژی و ناسەقامگیری لە عێراقدا و هەردوولاش هاوڕابوون كە مانەوەی هێزەكانی هاوپەیمانان لە عێراق و هەرێمی كوردستان گرنگە بۆ پاراستنی ئاسایش و سەقامگیریی عێراق.
