بەڕێوەبەری گشتیی رێکخراوی تەندروستیی جیهانی دەڵێت، جیهان لەبەردەم مەترسی بڵاوبوونەوەی پەتایەکی نوێدایە و ئەوەی کە هەیە لەسەر کات وەستاوە.
تیدرۆس ئەدهانۆم بەڕێوەبەری گشتیی رێکخراوی تەندروستیی جیهانی رایگەیاند، لەدوای کۆتاییهاتنی مەترسییەکانی کۆرۆنا، گومانمان لەوەدا نییە کە نەخۆشییەکی نوێ بڵاودەبێتەوە و دەبێتە هۆی لەناوبردنی ژمارەیەکی زۆری دانیشتووانی جیهان، بەڵام ئەوەی تا ئێستا پرسیارە لامان ئەمە کەی روودەدات.
ئاماژەی بەوەشکرد، پێویستە وڵاتانی جیهان بێ هیچ دواکەوتن و فەرامۆشکردنێک ئامادەکاری بۆ بەرەنگاربوونەوەی ئەو پەتا نوێیە بکەن، ناکرێت رێگەبدرێت هەڵەکانی رابردوو دووبارە بکرێنەوە.
ئاشکراشیکرد، “دەبێت لەگەڵ وڵاتانی ئەندام لە تەندروستیی جیهانی جارێکی دیکە پێداچوونەوە بە رێکەوتن و رێکارەکانی رابردوودا بکەین و رێکەوتنی نوێ واژوو بکەین”.
