دوو هاوڵاتیی عێراقی كە کوڕ و باوکێکن، بە تۆمەتی هاوکاریكردنی ڕێكخراوی داعش لەڕووی داراییەوە، لە پۆڵەندا دادگایی دەكرێن.
بە گوێرەی ڕاگەیاندراوی وەزارەتی ناوخۆی پۆڵەندا، ئەو دوو تۆمەتبارە لە مانگی حوزەیرانی ڕابردوودا دەستگیرکراون و دوێنێ دووشەممە یەكەم دانیشتنی دادگاییكردنیان بەڕێوەچووە.
كوڕ و باوكەكە تۆمەتبارن بەوەی لەڕێگەی هەژمارێکی بانکییەوە، ساڵی 2016 پارەیان ناردووە بۆ عێراق بە مەبەستی پشتیوانیكردنی كردەوەكانی ڕێكخراوی داعش لەڕووی داراییەوە.
جگە لەو دوو كەسە، چەند كەسێكی تری نزیك لە ڕێكخراوی داعش، پارەیان لەنێو خۆیاندا كۆكردووەتەوە و لە ڕێگەی بانكی “Western Union”ـەوە ڕەوانەی عێراقیان كردووە، ئەوەش وادەكات ئەگەر تۆمەتەکەیان بەسەردا ساغ ببێتەوە، هەریەكێكیان بۆ ماوەی 12 ساڵ زیندانی بکرێن.
