بەرپرسێکی ئەمریکی ئاشکرایکرد، ڕێککەوتنێکی سەرەتایی هەیە بۆ ئەنجامدانی کۆبوونەوەی نێوان جۆ بایدن و شی جینپینگ لە پەراوێزی کۆبوونەوەی لوتکەی هاوکاری ئابوری ئاسیا و زەریای هێمن.
ئاژانسی ئەسۆشێتد پرێس بڵاویکردووەتەوە، بەرپرسێکی حکومەتی ئەمریکا کە نەیویستووە ناوی ئاشکرا بکرێت، ئاماژەی بەوەکردووە هەریەکە لە واشنتۆن و پەکین بەشێوەیەکی سەرەتایی گەیشتوونەتە ڕێککەوتن بۆ ئەنجامدانی کۆبوونەوەیەک لە نێوان جۆ بایدن سەرۆکی ئەمریکا و شی جینپینگ سەرۆکی چین لە پەراوێزی کۆبوونەوەی لوتکەی هاوکاری ئابوری ئاسیا و زەریای هێمن.
ئەوەشی خستۆتەڕوو، “تا ئێستا نەگەیشتوونەتە رێککەوتن لەسەر وردەکارییەکان، کە بریتییە لە دیاریکردنی ڕۆژ و شوێنی کۆبوونەوەکە لەگەڵ چەند بابەتێکی دیکەی پەیوەست بە کۆبوونەوەکە”.
پێشتریش سەرۆکی ئەمریکا لەگەڵ وانگ یی وەزیری دەرەوەی چین لە کۆشکی سپی کۆبووەوە و گفتوگۆیەکی یەک کاتژمێری لەگەڵ ئەو بەرپرسە چینییە ئەنجامدا، سەبارەت بەو کۆبوونەوەیەش، جۆن کێربی، وتەبێژی ئەنجومەنی ئاسایشی نیشتمانی کۆشکی سپی ڕایگەیاند، جۆ بایدن دیدارەکەی لەگەڵ وەزیری دەرەوەی چین بە پێشهاتێکی ئەرێنی و دەرفەتێکی باش بۆ درێژەدان بە گفتوگۆ دەزانێت”.
