مامۆستایانی ناڕازی و وانەبێژان درێژەدان بە بایكۆتی هۆڵەكانی خوێندن دووپاتدەكەنەوە و دەشڵێن، رێگانادەن “ئۆپۆزسیۆنی ساختە” سوود لە خۆپیشاندان و ناڕەزایەتییەكانیان وەربگرێت.
دەستەی مامۆستایانی ناڕازی ئەمشەو لە بەردەم بەڕێوەبەرایەتیی گشتیی پەروەردەی سلێمانی لە كۆنگرەیەكی رۆژنامەنووسیدا لە راگەیەندراوێكدا جەختی لەسەر درێژەدان بە “بایكۆت” كردەوە و روونیشیكردەوە، لەئێستادا پلانی هیچ جۆرە خۆپیشاندان و گردبوونەوەیەكیان نییە، جگە لە پاڵپشتیكردن لە مامۆستایانی وانەبێژ.
ئەوەشی خستەڕوو، “لە هیچ لایەنێكی قبوڵناكەین، بەتایبەتی ئۆپۆزسیۆنی ساختە و كەسانی گومانلێكراو، كە سواری شەپۆلی ناڕەزایەتی مامۆستایان و فەرمانبەران بن”.
هاوكات نوێنەری مامۆستایانی وانەبێژ سەرەڕای جەختكردنەوە لە درێژەدان بە بایكۆتی هۆڵەكانی خوێندن، جەختی لەسەر داوای چارەسەری كێشەی وانەبێژان كردەوە.
