بەپێی توێژینەوەیەک هۆکارەکانی هەستکردن بە سەرئێشە زۆرە و یەکێک لە باوترین هۆکارەکان توڕەبوونە، هاوکات پێویستە لە دانیشتن بە شێوازێکی هەڵەش دووربکەویتەوە.
ماڵپەڕی دەیلی مێدیکەڵ ئینفۆ توێژینەوەیەکی لەسەر هۆکارە باوەکانی سەرئێشەی توند بڵاوکردۆتەوە و ئاماژە بەوە دەکات، یەکێک لە هۆکارەکانی سەرئێشەی بەردەوام و توند دەگەڕێتەوە بۆ خەوتنی زۆر دوای ئەنجامدانی چەندین رۆژ کارکردن، بۆنمونە دوای 6 رۆژ کارکردن لە رۆژی پشووەکەتدا زۆرترین کات بخەویت.
ئەوەشیان خستۆتەڕوو، توڕەبوون یەکێکە لە هۆکارە باوەکان و ماسولکەکانی پشتی مل و پێستی سەرت گرژ دەبن، ئەمەش دەبێتە هۆی هەستکردن بە سەرئێشەیەکی توند، هەروەها دانیشتنی هەڵەش یەکێکە لە هۆکارەکان کە دەبێتە هۆی دروستبوونی فشارێکی زۆر لەسەر ماسولکەکانی بەشی سەرەوەی پشت و مل و شان.
لە توێژینەوەکەدا هاتووە، بۆنی پاککەرەوەکانی ناوماڵ هەندێک مادەی کیمیایی تێدایە کە دەبێتە هۆی سەرئێشەیەکی توند و لە داهاتووشدا کێشەی تەندروستی گەورەتر دروستدەکات، هاوکات خراپی کەشوهەوا ئەگەرەکانی تووشبوون بە سەرئێشە زیاددەکات و کاریگەریی لەسەر دەمارەخانەکان و کیمیایی مێشکدا هەیە، ئەوەش دەمارەکان دەوروژێنێت و دەبێتە هۆی سەرئێشە.
