ڕۆژنامەی میرەر لە ڕاپۆرتێكدا ئاشكرایكرد كە تیمێكی بەریتانی تایبەتمەند كار لەسەر لابردنی ئەو “پاشماوە ترسناكە” دەكەن كە داعش لە ڕوبەڕێكی فراوانی سوریا و عێراق جێیهێشتووە.
بەپێی ڕۆژنامەكە ئەبوبەكر بەغدادی، سەركردەی كوژراوی داعش بە ماوەیەكی زۆر بەر لە مردنی فەرمانی بە شوێنكەوتووانی داوە مینی بەهێز لە ناوچەی بەرفراوانی سوریا و عێراق بچێنن.
ژمارەیەك لە جەنگاوەرە سەربازییە پێشینەكانی شانشینی یەكگرتووی بەریتانیا كە شارەزان لە هەڵگرتنەوەی مین ئەركەكەیان گرتوەتەئەستۆ و بەپێی ڕۆژنامەكەش لە هەر كاتێكدا لە بەردەم مەترسی هێرشی شانە نوستووەكانی داعش دان.
بە تەنها ژمارەی ئەو مین-انەی داعش لە سوریا چاندوونی بە نزیكەی 300 هەزار مین دەخەمڵێندرێن، كە تائێستا بوونەتە هۆی گیان لەدەستدانی سەدان كەس لە ڕۆژئاوای كوردستان و ناوچەكانی باكووری ڕۆژهەڵاتی ئەو وڵاتە.
بەپێی سەرچاوەكان داعش ژنان و منداڵانی ناچاركردووە بە دروستكردنی سەدان بۆمبی چێندراو و ڕۆژانە چاندنی لە ناوچە جیاجیاكاندا.
لەنێو ئەو مینانەی داعش جێی هیشتووە، ئەو جۆرانەن كە بە پێ پیادانانی یان نزیكبوونەوە یاخود تێپەڕبوون بەلایدا دەتەقنەوە.
بەشی زۆری مینەكە لەنێو گل و ژێر زەویدا دەشاردرێتەوە و ڕێكخراوەكە لە دەوروبەری ڕێگاكان و دەروازەی باڵەخانەكان و كێڵگە كشتوكاڵییەكان چاندوونی بۆ ڕێگری لە گەڕانەوەی خەڵك بۆ گوند و خانووەكانیان.
هەروەك چەندین مینی دژ تانك تایبەت بە تێكدان و پەكخستنی تانك و زرێپۆش چێندراون.
بەپێی ڕۆژنامەكە ئەو دانیشتووانانەی ناوچەكان كە پێشتر ڕاهێنراون كاری دۆزینەوەی مینەكان و دیاریكردنی شوێنەكەی و دانانی نەخشەكەی جێبەجێ دەكەن بەر لە چونی تیمە بەریتانییەكە بۆ پوچەڵكردنەوەی.
ڕۆب وود، شارەزا لە دروستكردنی بۆمب لە شانشینی یەكگرتوو وتی، چەكدارانی داعش مینەكانیان بە شێواز و ڕێگای زیرەكانە چاندووە كە وایكردووە هەڵگرتنەوەیان ئەستەم بێت و، ببێتە مایەی مەترسییەكی زۆر لەسەر زیانی ئەو كەسەی بە ئەركەكە هەڵدەستێت.
