وتەبێژی وەزارەتی دارایی هەرێم رایدەگەیەنێت، لێكتێگەیشتنی باش لە نێوان هەردوو وەزارەتی دارایی هەرێم و عێراقدا هەیە و دەشڵێت، “چاوەڕواندەكرێت هەفتەی داهاتوو 700 ملیار دینارەكە رەوانەبكرێت و ئێمەش ئامادەكارییەكانمان دەستپێدەكەین و دەست بە دابەشكردنی مووچە دەكرێت و حكومەتی هەرێم پابەندە بە دابینكردنی مووچەی سەرجەم مانگەكانی ئەمساڵی فەرمانبەران
هونەر جەمال وتەبێژی وەزارەتی دارایی هەرێم لە لێدوانێكی رۆژنامەوانیدا رایگەیاند، دوێنێ كۆبوونەوەیەكی گرنگ لە شاری بەغداد ئەنجامدرا و ئەو داتانانەی پەیوەستبوو بە پرسی فەرمانبەران خرایەڕوو كە لایەن دیوانی چاودێریی دارایی عێراقەوە پشتڕاستكرابووەوە.
راشیگەیاند، ناردنی 700 ملیار دینارەكە هیچ گرفتێكی نییە و پێشتر ئەنجومەنی وەزیرانی عێراق بڕیاری لێداوە و چاوەڕواندەكرێت هەفتەی داهاتوو رەوانەبكرێت و ئێمەش ئامادەكارییەكانمان دەستپێدەكەین و دەست بە دابەشكردنی مووچە دەكەین و حكومەتی هەرێم پابەندە بە دابینكردنی مووچەی سەرجەم مانگەكانی ئەمساڵی فەرمانبەران.
ئاشكراشیكرد، لێكتێگەیشتنی باش لە نێوان هەرێم و بەغداد هەیە بۆ هەمواركردنەوەی یاسای بودجە بە جۆرێك كە پرسی مووچە لە كێشە سیاسییەكان جیابكرێتەوە و لیژنەیەكی هاوبەش بۆ هەمواركردنەوەی یاسای بودجەش لە داهاتوودا پێكدەهێندرێت.
