سەرەڕای تێپەڕبوونی پێنج مانگ بەسەر دەستبەسەركردنی دوو برای خەڵکی بانە لەلایەن هێزەكانی ئیتڵاعاتەوە، تائێستا هیچ زانیارییەك لەبارەی چارەنووسی ئەو دوو کەسە لەبەردەست نیە.
سەرەتای مانگی ئایاری 2021 دوو برای خەڵکی گوندی (بەردەڕەش) سەر بە شاری بانە بە ناوەکانی (جەمال عەبدوڵڵایی و کەمال عەبدوڵڵایی) لەلایەن هێزەکانی ئیتڵاعاتی سوپای پاسداران دەستبەسەرکراون.
ڕێکخراوی مافی مرۆڤی هەنگاو لە زاری سەرچاوەیەكی ئاگادارەوە بڵاویكردەوە، ئەو دوو برایە دوای ئەوەی دەستبەسەرکراون، گوازراونەتەوە بۆ شوێنێکی نادیار و سەرەڕای تێپەڕبوونی پێنج مانگ، تائێستا بەدواداچوونەکانی بنەماڵەکەیان هیچ ئاکامێکی نەبووە و چارەنووسیان نادیارە.
دەستگیركراوەكان تائێستا هیچ پەیوەندییەکی تەلەفۆنییان لەگەڵ بنەماڵەیان نەبووە و لە مافی هەبوونی پارێزەریش بێبەشکراون.
سەرچاوەکە كە ناوی ئاشكرانەكراوە ئاشكراشیكردووە، تۆمەتی سەر ئەو دوو برایە ئەوەیە گوایە چەند کەسێکیان لە سنووری بانە دەربازکردووە کە گومانی ئەوەیان لێدەکرێت دەستیان لە کوشتنی موحسین فەرخیزاده، زانای ئەتۆمیی ئێران هەبووبێت.
