وەزیری دارایی بە یاوەریی شاندێكی هەرێم بەرەو بەغداد بەڕێكەوت.
وەزارەتی دارایی و ئابوریی هەرێم بڵاویكردەوە، لەسەر بانگێشتی لیژنەی دارایی ئەنجومەنی نوێنەرانی عێراق، ئێوارەی ئەمڕۆ ئاوات جەناب نوری، وەزیری دارایی و ئابوری هەرێمی کوردستان، بە یاوەری هەریەک لە ئومێد سەباح، سەرۆکی دیوانی ئەنجومەنی وەزیران و ئامانج رەحیم، سکرتێری ئەنجومەنی وەزیران و عەبدولحەکیم خەسرەو، سەرۆکی فەرمانگەی هەماهەنگی و بەدواداچوون و ژمارەیەک لە راوێژکار و بەڕێوبەرە گشتییەکانی وەزارەتی دارایی و وەزارەتی سامانە سروشتییەکان بەرەو شاری بەغداد بەڕێکەوتن.
بڕیارە سبەی چوارشەممە لە دانیشتنێکی تایبەتی لیژنەی دارایی ئەنجومەنی نوێنەران، بە ئامادەبوونی وەزیری دارایی عێراق، وەزیری دارایی و ئابوریی هەرێمی کوردستان راپۆرتێک لەسەر کێشە و گرفتەکانی نێوان هەرێم و بەغداد لەسەر پرسی بودجە و مووچە بخاتەڕوو، وەك ئەوەی وەزارەتی دارایی بڵاویكردووەتەوە.
ئاماژەشدەدات، هاوکات بڕیارە زانیاریی تەواو لەسەر خەرجی و داهاتی شەش مانگی سەرەتای ساڵی 2023 و ژمارەی فەرمانبەر و مووچەخۆرانی هەرێمی کوردستان بداتە لیژنەی دارایی ئەنجومەنی نوێنەران کە لەلایەن شاندی هاوبەشی هەردوو دیوانی چاودێری دارایی عێراق و هەرێمی کوردستان وردبینی کراوە.
