ئەنجومەنی زانکۆی سلێمانی هۆشداری دەداتە بەرپرسانی حکومەت لەبارەی دەستپێکردنەوەی دەوامی زانکۆ و داوا دەکات بە زووترین کات مووچەی مامۆستایان و فەرمانبەران و دەرماڵەی خوێندکاران دابەشبکرێت.
ئەمڕۆ ئەنجومەنی زانکۆی سلێمانی کۆبوونەوەی ئاسایی هەفتانەی خۆی ئەنجامدا و دواتر لە راگەیەندراوێکدا بڵاویکردەوە، چوار کۆبوونەوەی تایبەت بە دەستپێکردنەوەی پرۆسەی خوێندن لە زانکۆی سلێمانی ئەنجامدراوە، لەسەرجەمیاندا جەخت لە شایستەداراییەکانی مامۆستایان و فەرمانبەران و خوێندکاران کراوەتەوە.
هەر لە راگەیەندراوەکەدا هاتووە، “پرۆسەی خوێندن لە زانکۆی سلێمانی پەیوەندیدارە بە چارەنووسی خوێندنی 23 هەزار خوێندکار بەپێی پێوەرە زانستی و نێودەوڵەتییەکان لەژێر مەترسیی هەڵپەساردندایە”.
داواشیکردووە، هەنگاوی بەپەلە و خێرا بۆ چارەسەری کێشەی مووچە و شایستە داراییەکان بنردێت و سەرجەم لایەنە پەیوەندییدارەکان دەخەینە بەردەم بەرپرسیارێتییەکی مێژووییەوە تایبەت بە پرۆسەی خوێندن لە زانکۆی سلێمانی.
