مامۆستایانی وانەبێژ لە وەڵامێکیاندا بۆ وەزارەتی پەروەردەی هەرێم رایدەگەیەنن، “سوپاسکردن گیرفانی بەتاڵی مامۆستایانی وانەبێژ پڕناکاتەوە و بایکۆت دەکەین تا دادەمەزرێین”.
لە وەڵامێکیاندا بۆ وەزارەتی پەروەردەی حکومەتی هەرێمی کوردستان، مامۆستایانی وانەبێژ راگەیەندراوێکیان بڵاوکردەوە و ئاماژەیان بەوە کرد، “لەبری ئەوەی حکومەتی هەرێم مامۆستایانی وانەبێژ لە کۆنووسی وەزارەتی دارایی و پەروەردە بکات بە هەمیشەیی، پەروەردەی هەرێم سوپاسی مامۆستایان دەکات”.
دەشڵێن، “سوپاسکردن گیرفانی بەتاڵی مامۆستایانی وانەبێژ پڕناکاتەوە، نە ئێستا و نە داهاتوو، لەبری ئەوەی وەزارەتی پەروەردە فشار لە حکومەتی هەرێم بکات بۆ دامەزراندن، راگەیەندراو بڵاودەکاتەوە و داوا دەکات بایکۆت بشکێندرێت و دەوام بکەین”.
ئەو مامۆستایانە جەخت لەوە دەکەنەوە، “ئێمە بایکۆت ناشکێنین تا سەرجەم مامۆستایانی وانەبێژ دەکرێن بە گرێبەستی هەمیشەیی”.
