ئەندامێکی سەرکردایەتیی یەکێتی رایدەگەیەنێت، “لە کۆنگرەدا هەموو رەهەندەکان گفتوگۆیان لەبارەوە کراوە و لە هەڵبژاردنەکانی داهاتوودا یەکێتی دەبێت بە ژمارەیەکی گەورە”
ستران عەبدوڵا، ئەندامی ئەنجومەنی سەرکردایەتیی یەکێتی لە دیداریکدا ئەوەی خستەڕوو، “کۆنگرەیەکی چڕ و پڕمان بەڕێوەبرد، هەموو رەهەندەکان گفتوگۆیان لەبارەوە کرا و ئەندامانی کۆنگرەکەش بە شێوەیەکی باش بەشداربوون”.
ئەوەشی خستەڕوو، “پێشنیاری دروستکردنی لیژنەیەک کراوە بۆ روونکردنەوەی سیاسەتی یەکێتی بۆ ئەندامان و لایەنگرانی یەکێتی کە بەشداری کۆنگرە نەبوون، ئەو ئەندام و لایەنگرانەی کە تێبینییەکیان هەیە دەتوانن لەو کاتەدا بیخەنەڕوو چونکە یەکێتی حزبێکی گەورەیە و جێگای هەموومانی تێدا دەبێتەوە”.
سەبارەت بە هەڵبژاردنەکانی داهاتوو ئەو ئەندامەی سەرکردایەتی دەڵێت، “لە هەڵبژاردنەکانی داهاتوودا یەکێتی دەنگێکی زۆر بەدەست دەهێنێت و دەبێتە ژمارەیەکی گەورە”.
