بزوتنەوەی گۆڕان پەیامێكی پیرۆزبایی ئاراستەی یەكێتیی نیشتمانیی كوردستان كرد
دەقی پەیامەكەی بزوتنەوەی گۆڕان:
بەڕێزان: سەرۆك و ئەندامانی ئەنجومەنی سەركردایەتی یەكێتیی نیشتمانیی كوردستان
بەبۆنەی تەواوكردنی كارەكانی كۆنگرەی پێنجەمی یەكێتی نیشتمانی كوردستان و هەڵبژاردنی سەرۆك و ئەندامانی ئەنجومەنی سەركردایەتی، پیرۆزبایتان ئاڕاستە دەكەین و ئومێدی سەركەوتنتان بۆ دەخوازین.
كۆنگرەكەتان لەكاتێكدایە، هەرێمی كوردستان لەبەردەم چەندین قەیرانی سیاسی، ئابوری و دارایی، بۆشایی دامەزراوەیی، بێمتمانەیی لەنێوان پارتە سیاسییەكان، بێمتمانەیی هاونیشتیمانیان بە دامەزراوە گشتییەكان و لایەنە سیاسییەكانە، ئەم دۆخە ناهەموارە پێویستی بە كاری پێكەوەیی و باشكردن و ئاساییكردنەوەی پەیوەندی نێوان لایەنە سیاسییەكانە، بە ئامانجی دۆزینەوەی چارەسەری ڕیشەیی بۆ قەیرانەكان و باشتركردنی دۆخی ژیان و بژێوی هاوڵاتییان.
ئومێدەوارین ئەنجامەكانی ئەم كۆنگرەیە، هاندەری زیاتری تەبایی و یەكگوتاریی كوردستانی بێت لەسەر ئاستی عێراق و ناوچەكە بۆ بەیەكەوە رووبەڕووبونەوەی ئەو ئاستەنگ و ئاڵنگارییەی بەرۆكی هەرێمی كوردستانیان گرتووە، لە ناوخۆی هەرێمیشدا دەرفەتێك بێت بۆ وەڵامدانەوەی پێداویستییەكانی خەڵك و خزمەتكردنی زیاتری هاونیشتیمانیان.
