یەکێتیی مامۆستایان داواکارییەک ئاڕاستەی حکومەتی هەرێم دەکات و رایدەگەیەنێت، “داواکارین لە حکومەتی هەرێمی کوردستان مووچەی مانگی هەشت و نۆ و شایستە داراییەکانی مامۆستایانی وانەبێژ بەیەکەوە دابەش بکات”.
لە راگەیەندراوێکیاندا کە وێنەیەکی دەست تۆڕی میدیایی ئێستا کەوتووە، لقی سلێمانی یەکێتیی مامۆستایان ئاماژە بەوە دەکات، “لەکاتێکدا بە ئومێدەوە چاوەڕێی حکومەتی هەرێمی کوردستان بووین کە بۆ یەکجار داخوازی مامۆستایانی نیگەران جێبەجێ بکات، بەڵام ئەمجارەش کادری هەستیارترین سێکتەری بەڕێوەبردن و حکومەتداری فەرامۆشکرد”.
ئەوەشی خستۆتەڕوو، “ئەم بێ باکییەی حکومەت، نیگەرانییەکان و مەودای دووری نێوان مامۆستا و حکومەت فراوانتر دەکات و هێندەی تر کەرتی پەروەردە و فێرکردن بەرەو ئیفلیجبوون دەبات”.
دەشڵێت، “داواکارین لە حکومەتی هەرێمی کوردستان مووچەی مانگی هەشت و نۆ و شایستە داراییەکانی مامۆستایانی وانەبێژ بەیەکەوە دابەش بکات، چونکە ئەو کارە دەبێتە متمانە بەخشینەوە و بوژانەوەی پڕۆسەی پەروەردە و فێرکردن”.
