سكرتێری گشتیی سۆسیالیست ئینتەرناشیۆناڵ پشتیوانی خۆی بۆ كۆنگرەی پێنجەمی یەكێتی نیشتمانی كوردستان رادەگەیەنێت و پشتگیری لە خواستەكانی یەكێتی دەكات بۆ كۆمەڵگەیەكی گشتگیرتر، دیموكراسیتر و یەكسانتر.
بێندێكتا لاسی سكرتێری گشتیی سۆسیالیست ئینتەرناشیۆناڵ بەبۆنەی كۆنگرەی پێنجەمی یەكێتی نیشتمانی كوردستانەوە پەیامێك ئاڕاستەی سەرۆك و سەركردایەتی و ئەندامی ئەو حزبە دەكات و لە پەیامەكەیدا هاتووە، بەبۆنەی كۆنگرەی پێنجەمتان سڵاوێكی گەرم و دڵسۆزانەتان ئاراستە دەكەم، بەناوی سۆسیالیست ئینتەرناشیۆناڵەوە، شانازی و ئیمتیازێكی گەورەیە كە پەیامی هاودەنگی و پشتیوانیمانتان پێبگەیەنین لەكاتێكدا ئێوە كۆدەبنەوە بۆ وردبوونەوە لە كارەكانتان وەك حزب، پێمناخۆشە سەرەڕای هەوڵدانم بەڵام ناتوانم لەم كۆنگرەیەدا خۆم ئامادەبم”.
دەشڵێت، “ئێمە وەك ئەندامانی سۆسیالیست ئینتەرناشیۆناڵ، هاودەنگیین لەگەڵتاندا، پشتگیری لە خواستەكانتان دەكەین بۆ كۆمەڵگەیەكی گشتگیرتر و دیموكراسیتر و یەكسانتر، ئێمە پێمانووایە لە ڕێگەی گفتوگۆ و هاوكاری و پابەندبوون بە بەها هاوبەشەكان، دەتوانین هەموومان بەشداریبكەین لە داهاتوویەكی باشتر بۆ هەمووان”.
هەر لە پەیامەكەیدا هاتووە، هیوای سەركەوتنتان بۆ دەخوازم لەم كۆنگرەیەدا و چاوەڕێی ئەوەم كە بتوانم لە زووترین كاتدا سەردانتان بكەم لە عێراق.
