ماڵپەڕی ئێراک ئۆیل ریپۆرت ئاماژە بەوەدەکات، بەرهەمهێنانی نەوت لە مانگی ئابدا لە هەرێم زیادیکردووە و گەیشتووەتە نیوەی بەرهەمی هەناردەکراوی پێشوو.
لە راپۆرتێکدا ماڵپەڕی ئێراک ئۆیل ریپۆرتدا (Iraq Oil Report) هاتووە کە سەرەڕای بەردەوامی داخستنی بۆری نەوتی باكوور، لە مانگی ئابی رابردوودا بەرهەمهێنان لە كێڵگە نەوتیەكانی هەرێمی كوردستان زیادیكردووە.
ئەوەشی خستۆتەڕوو، “بەرهەمهێنانی نەوت لەو كێڵگانەدا گەیشتووەتە نزیکەی نێوەی ئەو بەرهەمەی لە پێشوتردا بەرهەمی دەهێناو هەناردەی دەرەوەی دەكرد و بەرهەمەکەش لە بازاڕە ناوخۆییەكان دەفرۆشێت”.
دەشڵێت، “بەرهەمهێنانی نەوت لە مانگی ئابدا، لە عێراق گەیشتووەتە چوار ملیۆن و 710 هەزار بەرمیلی رۆژانە، لەكاتێكدا لەمانگی تەمموزدا چوار ملیۆن و 560 هەزار بەرمیل بووە”.
