ئەندامێكی ئەنجومەنی نوێنەرانی عێراق رایدەگەیەنێت، وەزارەتی ناوخۆی عێراق بڕیاریدا چوار بینا بۆ فەرمانگە فیدراڵییەكانی عێراق لە هەڵەبجە دروستبكرێت و تێچوو و پێویستییەكانیان بگرێتە ئەستۆ.
چرۆ حەمەشەریف ئەندامی ئەنجومەنی نوێنەرانی عێراق لە لێدوانێكی رۆژنامەوانیدا رایگەیاند، فەرمانگە فیدراڵییەكانی هەڵەبجە بیناكانیان بچووكە و ناتوانرێت وەك پێویست كاری هاوڵاتییان راییبكەن، لە كۆبوونەوەیەكمان لەگەڵ وەزارەتی ناوخۆ بەڵێنیاندا چوار بینا لەسەر رووبەری چوار دۆنم لە شاری هەڵەبجە بۆ فەرمانگە فیدراڵییەكانی عێراق لە هەڵەبجە دروستبكەن كە تێچوو و پێویستییەكانیان بخرێتە ئەستۆی حكومەتی عێراق.
راشیگەیاند، بڕیارە شاندێكی وەزارەتەكە سبەی سەردانی پارێزگای هەڵەبجە بكەن بە مەبەستی جێبەجێكردنی رێكارەكانی تایبەت بە دەركردنی پاسپۆرتی ئەلیكترۆنی لەو شارە.
