ڕۆژنامەیەكی كوەیتی ئاشكرایكردووە، سوپای پاسدارانی ئێرانی موشەك و فرۆكەی بێفڕۆكەوان دەگوازێتەوە بۆ عێراق.
ڕۆژنامەی قەبەسی كوەیتی لە ڕاپۆرتێكیدا كە ئێوارەی دوێنێ شەممە 26ی كانونی یەكەم بڵاویكردووەتەوە، ئاشكرایكردووە، “سوپای پاسدارانی ئێران دەستیكردووە بە گواستنەوەی موشەكی جۆری ئارش و فڕۆكەی بێفڕۆكەوانی دروستكراوی ئێرانی بۆ عێراق”.
ڕۆژنامەكە لە چەند سەرچاوەیەكی ئێرانییەوە زانیارییەكانی وەرگرتووە، ئاشكرایان كردووە، “پرۆسەی گواستنەوەی ئەو چەكانە بۆ عێراق بە دوو قۆناغ بووە، سەرەتا لە تارانەوە گواستراونەتەوە بۆ سەربازگەی كەوسەر، دواتر بۆ عێراق گواستراونەتەوە”.
لە ڕاپۆرتەكە ئەوەش خراوەتەڕوو، “فەیلەقی قودسی سەربە سوپای پاسداران ئەو موشەك و فڕۆكە بێفڕۆكانەی نەخستووەتە ژێر دەستی گروپە عێراقییەكان، بەڵكو لە چەند پێگەیەكی سەربازیی خۆی لە عێراق لەژێر چاودێرییەكی چڕدا لە كۆگا دایناون”.
لەگەڵ ئەو چەكانەدا، ئێران دوو یەكەی شارەزای ناردووە بۆ عێراق كە ئەفسەری سوپای پاسدارانی تێدان، شارەزان لە هەڵدانی ئەو موشەكانە و بەكارهێنانی درۆنەكان، وەك لە ڕاپۆرتەكەی ڕۆژنامە كوەیتییەكەدا هاتووە.
