وەزارەتی پەروەردەی حکومەتی هەرێمی کوردستان ژمارەیەک رێنمایی بۆ باخچەکانی ساوایان دەرکرد، بەپێی بڕیارەکە مانگانە بۆ باخچە حکومییە کورتخایەنەکان بڕی 10 هەزار و درێژخایەنەکان بڕی 20 هەزار دینار وەردەگیرێت.
وەزارەتی پەروەردە 13 رێنمایی نوێی بۆ باخچە حکومییەکانی منداڵان دەرکردووە، تێیدا هاتووە، ئەو باخچە حکومییانەی منداڵ تاوەکو کاتژمێر 1:30 تێیاندا دەمێنێتەوە بڕی 10 هەزار دیناری مانگانە لە دایکان و باوکان وەردەگیرێت.
هەروەها بۆ باخچە حکومییە درێژخایەنەکان کە تاوەکو کاتژمێر 2:30 منداڵ دەمێنێتەوە تێێدا بڕی 20 هەزار دیناری مانگانە وەردەگیرێت و ئەو بڕە پارەیەش بۆ نانخواردنی منداڵەکانە.
لەوبارەیەوە تریفە محەمەد بەڕێوەبەری پەروەردەی رۆژهەڵاتی سلێمانی بە تۆڕی میدیایی ئێستای وت، “بەر لە چەند ساڵێک بڕی ئەو پارەیەی لە دایکان و باوکان لە باخچەی ساوایانی حکومی وەردەگیرا پێنج هەزار دینار بوو، بەڵام ئێستا لە وەزارەتەوە نرخەکەی بەرزکراوەتەوە”.
بەسی لەوەشکرد کە هۆکارەکەی بۆ گرانبوونی کاڵا و خۆراک دەگەڕێتەوە لە بازاڕدا، کە دەبێت باخچەکان بیکڕن بۆ خواردنی منداڵەکان، راشیگەیاند، ئەو پارەیە لە سندوقی تایبەتدا دادەنرێت و لیژنەی تایبەت چاودێریی دەکات.
