خاچی سوور لە بانگەوازێکی جیهانیدا داوای زیاتر لە 100 ملیۆن دۆلاری کرد بۆ ئەوەی هاوکارییە زۆر پێویستەکان بۆ زیانلێکەوتووانی مەغریب دابینبکەن، ئەوەش دوای چەند ڕۆژێک لە بوومەلەرزەیەکی بەهێز کە زیاتر لە دوو هەزار و 800 کەس لەو وڵاتە بەهۆیەوە گیانیان لەدەستدا.
کارۆلین هۆڵت بەڕێوەبەری کارەسات و کەشوهەوا و قەیرانەکان لە رێکخراوی خاچی سووری نێودەوڵەتی رایگەیاند، ” دەمانەوێت نزیکەی 112 ملیۆن دۆلار کۆبکەینەوە بۆئەوەی بتوانین لەم کاتەدا پێداویستییە سەرەتاییەکان وەک کەرەستەی تەندروستی و فریاگوزاری، ئاو، لەگەڵ شوێنی حەوانەوە بۆ زیانلێکەوتووانی بومەلەرزەکەی مەغریب دابینبکەین”.
لای خۆیانەوە تیمە فریاگوزارییەکانی بەریتانیا و قەتەر و ئیسپانیا و ئیمارات هاوکاریی حکومەتی مەغریب دەکەن لە گەڕان و پشکنین بۆ دۆزینەوەی ئەو کەسانەی کەوتوونەتە ژێر داروپەردوی بینا رووخاوەکان، لەلایەکی ترەوە بەپێی ئامارێکی دەستەی لێکۆڵینەوەی جیۆلۆجی ئەمریکا زیانەکانی ئەو بوومەلەرزەیە لە نێوان 7 بۆ 10 ملیار دۆلار دایە.
