سەندیکای کارمەندانی تەندروستی رایگەیاند کە دۆخی گوزەرانی کارمەندەکانیان خراپە بەهۆی دواکەوتنی مووچە و لەژێر فشاری زۆری ئەندامەکانیاندان، هەروەها باسی لە نەبوونی دادپەروەری کرد کە لە هەولێر و دهۆک بە شاراوەیی خەڵک دادەمەزرێنرێن و سلێمانی لێی بێبەشە.
لە کۆنگرەیەکی رۆژنامەوانیدا سەندیکای کارمەندانی تەندروستیی سلێمانی رایگەیاند، لە سلێمانی، هەڵەبجە و گەرمیان ماوەی دوو مانگ و 20 رۆژە لە 164 بنکە و ناوەندی تەندروستی بایکۆتی دەوام کراوە.
باسی لەوەکرد کە ئەوان لە سەندیکاکەیان رۆژانە سەردانیان دەکرێت و کارمەندانی تەندروستی بەهۆی نەبوونی مووچەوە ناتوانن پێداویستییەکانیان دابینبکەن و داوای هاوکاری دەکەن.
وتیشی، لە دوای دابەشکردنی مووچەی مانگی رابردووەوە زیاتر لە 40 رۆژە مووچە دابەشنەکراوە لەکاتێکدا مانگی رابردووش مووچە هەر دواکەوتبوو.
سەرۆکی سەندیکاکە باسی لە پرۆسەی دامەزراندن کرد و رایگەیاند، لەگەڵئەوەی بەردەوام لە کارمەندانی تەندروستی خانەنشین دەبن و کەمدەبنەوە، بەڵام هیچ کەسێک دانامەزرێنرێت و جێگەکانیان پڕناکرێتەوە، وتیشی، لە ماوەی رابردوودا چەند جارێک بە لیستی نهێنی لە هەریەکە لە دهۆک و هەولێر کارمەندی تەندروستی دامەزرێنراون بەڵام سلێمانی لەوە بێبەش کراوە.
