ئەندامێكی ئەنجومەنی نوێنەرانی عێراق رایدەگەیەنێت، كێشەی مووچەی فەرمانبەرانی هەرێم چارەسەر نەكرێت وەزیری دارایی عێراق بانگهێشتی پەرلەمانی عێراق دەكەین و دەشڵێت، “ناكرێت مووچەی فەرمانبەران تێكەڵ بە كێشە سیاسییەكانی نێوان هەرێم و بەغداد بكرێت”.
سروە محەمەد ئەندامی ئەنجومەنی نوێنەرانی عێراق لە لێدوانێكدا بە تۆڕی میدیایی ئێستای راگەیاند، ناكرێت فەرمانبەرانی عێراق مووچەكانیان لە كاتی خۆیدا وەربگرن و مووچەی فەرمانبەرانی هەرێم چەند مانگێك دوابكەوێت، بۆیە پێشتریش رامانگەیاند كێشەی مووچەی فەرمانبەرانی هەرێم چارەسەر نەكرێت وەزیری دارایی عێراق بانگهێشتی پەرلەمان دەكەین و پێویستە هۆكارەكەی روونبكاتەوە.
ئەو پەرلەمانتارە ئاماژەی بۆ ئەوەش كرد، ناكرێت بابەتی مووچەی فەرمانبەرانی هەرێم تێكەڵ بە كێشە سیاسییەكانی نێوان هەرێم و بەغداد بكرێن و پێویستە ئەو پرسە چارەسەر بكرێت و بەپێی یاسای بودجە، مووچە و پشكی هەرێم رەوانەبكرێت.
