ئاسۆ مامەند، كارگێری مەكتەبی سیاسیی یەكێتیی نیشتمانیی كوردستان لە دیدارێكی تەلەفزیۆنیدا رایگەیاند، “لە یەكەمین رۆژی داخستنی رێگای كەركوك – هەولێر زۆر هەوڵماندا كێشەی بارەگایەك نەبێتە هۆی داخستنی رێگەی هاوڵاتییان”.
راشیگەیاند، پێمانووایە ئەمەی دەكرێت جۆرێك لە پیلانە و پێشتر خەڵكی كەركوكمان لە مەترسییەكان ئاگاداركردووەتەوە و لە رێگای خالید شوانییەوە حكومەتی عێراقمان ئاگاداركردووەتەوە ناكرێت دۆخەكە بەم شێوەیە بەردەوامبێت.
ئاماژەی بۆ ئەوەش كرد، پارتی زۆرینەی لق و بارەگاكانیان وەرگرتووەتەوە بۆ یەك بارەگا دۆخی كەركوكیان ئاڵۆزكردووە و بۆیە داوا لە هاوڵاتییانی شارەكە دەكەین ئارام بگرن.
جەختیكردەوە، رێگای كەركوك – هەولێر نەكرێتەوە هەڵوێستی توندمان دەبێت و ئێمە پێشتر داوای یەكڕیزییمان كردووە و لایەنە عەرەبییەكان ئەو دۆخەی ئێستا وەك بانگەشەی هەڵبژاردن بەكاردەهێنن.
