خۆپیشاندانەكەی ئێوارەی ئەمڕۆی كەركوك گرژی و ئاڵۆزی لێكەوتەوە و گەنجێكی كورد بە تەقەی هێزە ئەمنیەكان گیانیلەدەستدا و ژمارەیەكی دیكەش برینداربوون و قەدەغەی هاتوچۆش راگەیەندرا.
پەیامنێری تۆڕی میدیایی ئێستا لە كەركوك گواستییەوە، لە خۆپیشاندانەكەی ئێوارەی ئەمڕۆی شاری كەركوكدا گرژی و ئاڵۆزی لێكەوتەوە و داوای كردنەوەی رێگای سەرەكی كەركوك – هەولێر دەكرێت لە كاتێكدا ماوەی زیاتر لە هەفتەیەكە لەلایەن ژمارەیەك لە هاوڵاتییانی عەرەبەوە رێگاكە داخراوە.
هەر بەپێی زانیارییەكان ئەو كەسەی گیانیلەدەستدا پێشمەرگە بووە لە فەوجی دووی هێزەكانی 70ی پێشمەرگە و پێنج هاوڵاتيی كورد لە گرژییەكانی ئێوارەی ئەمڕۆدا برینداربوون و تاكاتێكی نادیار قەدەغەی هاتوچۆ لەناو شاری كەركوك راگەیەندرا.
هاوكات پاشنیوەڕۆی ئەمڕۆ مەڵبەندی كەركوكی یەكێتی روونكردنەوەیەكی بڵاوكردەوە و رایگەیاند، “پارتی و چەند لایەنێكی شۆڤێنی گرفت بۆ هاوڵاتییان دروستدەكەن و دەشڵێت، “پارتی ھەوڵدەدات كێشەكان هەناردەی كەركوك بكات كە بە داخەوە ماوەی چەند رۆژێكە، بەمەبەست و سیناریۆی جۆراوجۆر، پارتی و چەند لایەنێكی شۆڤێنی كەركوك، كێشە و گرفت بۆ ھاوڵاتییانی كەركوك دروستدەكەن”.
هەر لە روونكردنەوەكەدا هاتووە، ئێمە وێرای ئەوەی لەگەڵ داخستنی رێگای سەرەكیی كەركوك-ھەولێر نین، لە رێگای كەناڵە سیاسی و دیپلۆماسییە جیاوازەكانەوە، ھەوڵی جدیمان داوە و سێ سەرۆكایەتییەكەی عێراقمان لێئاگاداركردووەتەوە، بۆ كردنەوەی ئەو رێگایە، چارەسەركردنی كێشەكان بە دیالۆگ و لێكتێگەیشتن، بەشێوەیەك لە خزمەتی ھاوڵاتییانی كەركوك بێت.
