بەڕێوەبەرایەتیی گشتیی هاتوچۆی هەولێر شۆفێران ئاگاداردەکاتەوە لەبارەی بەکارهێنانی رێگا خێراکانەوە و ژمارەیەک رێنمایی لەوبارەیەوە بڵاودەکاتەوە.
بەڕێوەبەرایەتییەکە لە راگەیەندراوێکدا ئاشکرایکردووە، “رێنماییەکان بۆ زیاتر سەلامەتیی شۆفێران و هاوڵاتییانە”، داواشدەکات هەموو لایەک پێوەی پابەندبن.
رێنماییەکان کە هەندێک لە بەکارهێنانی شەقامە خێراکان قەدەغە دەکات بەمجۆرەن:
١- وەستان و چاوەڕێکردن بە بێ هۆکاری لەناکاو.
٢- گەڕانەوە بە بەگ بە هەموو شێوەیەک.
٣- نابێت پیادەڕۆیان لەسەر شەقامی خێرا بپەڕنەوە، مەگەر پردەکان بەکاربهێنن.
٤- کڕین و فرۆشتن و مامەڵە لەسەر شەقامە خێراکان.
٥- رۆیشتنی ئەو سوارڕۆیانەى کە خێراییان لە 60 کم لە کاتژمێرێکدا کەمترە.
٦- رۆیشتنی سوارڕۆکانی بیناسازی و کشتوکاڵی وەکو تراکتۆر و دەڕاسە و گرێدەر و شۆڤڵ و تەنانەت بۆ مەوداى چەند مەترێکیش، بەڵکو دەبێت بە ئامێری هەڵگرتنی تایبەت بگوازرێنەوە.
٧- پێچاوپێچکردن و تەڕناش و کێبڕکێ.
٨- بەکارهێنانی مۆبایل و سۆشیالمیدیا.
٩- پێچکردنەوە لە شوێنە تایبەتەکانی ئۆتۆمبێلی فریاگوزاریی خێرا یان هەر دەرچەیەکی دیکەى فریاگوزاری.
١٠- هەڵگرتن و دابەزاندنی سەرنشین.
١١- لێدانی فوول لایت.
١٢- لێخوڕینی پایسکیل و مۆپید و سکۆتەر و ماتۆڕی سێتایە.
