لەلایەن تیمێكی هاوبەشی بەڕێوەبەرایەتیی شوێنەواری سلێمانی و زانكۆی چوبۆی ژاپۆنی، شوێنەوارێكی گرنگ لە گردی یاسین تەپە لە ناحیەی تانجەرۆی سلێمانی دۆزرایەوە، كە مێژووەكەی بۆ زیاتر لە دوو هەزار و پێنجسەد ساڵ پێش ئێستا دەگەڕێتەوە.
د. هەڤاڵ ئەبوبەكر، پارێزگاری سلێمانی رایگەیاند، لە ماوەی هەفتەیەك كاركردنی تیمەكەدا، بەرهەمی زۆر باشی هەبووە و شتی دەگمەن و گرنگی تێدا دۆزراوەتەوە كە لە عێراق و كوردستاندا تەنها لێرە هەیە.
ئاماژەی بەوەشكردووە، بەپێی چینە زانستییەكان، لەسەردەمی چاخی بەردینی نوێوە دەستپێدەكات، تا سەردەمی ئیسلامی، هەروەها ئەم تیمە تایبەتە لە چینی سەردەمی ئاشووری كاردەكەن و پاشماوەی خانوو و كۆڵان و شوێنی ناشتن دۆزراونەتەوە لەگەڵ پارچەی شوێنەواریی دەگمەن و ناوازە.
پارێزگاری سلێمانی راشیگەیاند، ئەم زەوییە، بەشێوەیەكی زۆر سەرنجڕاكێش و ناوازە بە بەرد چنراوە، دەتوانین بڵێین بەشێوەیەكی ئەندازەیی كراوە و جێی تێڕامان و سەرنجلێدانە.
سەبارەت بە كارەكانی ئایندە لە بواری كنەوپشكنین و دۆزینەوەی شوێنەواردا، د. هەڤاڵ ئەبوبەكر ئاشكرایكرد، “بڕیارە بەڕێوەبەرایەتیی شوێنەواری سلێمانی بە هەماهەنگیی تیمی زانكۆ نێودەوڵەتییە هاوبەشەكان، خولێكی فێربوون بۆ چەند ئامێرێك بكاتەوە، كە لە كنەوپشكنیندا بەكاردەهێنرێن.
