بەپێی توێژینەوەیەک کە لەلایەن دامەزراوەی سەرچاوە جیهانییەکان (WRI ) بڵاوکراوەتەوە، بیست و پێنج وڵات کە چارەکێکی دانیشتوانی جیهان پێکداهێنێت، رووبەڕووی فشاری ئاوی زۆر دەبنەوە .
داتاکانی دامەزراوەی سەرچاوە جیهانیەکان کە رۆژنامەی گاردیان بڵاویکردووەتەوە، ئاماژە بەوە دەکەن کە ئەم وڵاتانە ساڵانە بە بەردەوامی ٨٠%ی ئاوەکانیان بەکاردەهێنن.
نەخشەی مەترسییەکانی ئاو ئاشکرای دەکات کە خواست لەسەر ئاو لە سەرانسەری جیهاندا لە زیادبووندایە و لە ساڵی 1960ـەوە دوو هێندە زیادی کردووە.
لە کاتێکدا خواست لەسەر ئاو لە ئەوروپا و ئەمریکا ئاستێکی بەرز تۆماردەکات، لە ئەفریقاش لە بەرزبوونەوەدایە، پێشبینی دەکرێت تا ساڵی 2050 خواست لەسەر ئاو لە سەرانسەری جیهان لە نێوان 20% بۆ 25% زیاد بکات.
ئەو 25 وڵاتەی زۆرترین فشاری ئاویان بەخۆیەوە بینیوە بریتین لە سعودیە، چیلی، سان مارینۆ، بەلجیکا و یۆنان، پێنج وڵات رووبەڕووی زۆرترین فشاری ئاوی بوونەتەوە بریتین لە بەحرەین، قوبرس، کوەیت، لوبنان و عومان.
لەگەڵ ئەم ئاستە لە فشاری ئاودا ژیان و کار و ئاسایشی خۆراک و وزەی مرۆڤەکان دەخاتە مەترسییەوە، ئاو پێویستە بۆ گەشەکردنی بەروبووم و بەخێوکردنی ئاژەڵ و بەرهەمهێنانی کارەبا و پاراستنی تەندروستیی مرۆڤ و گەیشتن بە ئامانجە جیهانییەکانی کەشوهەوا.
نووسەرانی توێژینەوەکە دەڵێن، بەبێ بەڕێوەبردنی باشتری ئاو، زیادبوونی ژمارەی دانیشتووان و گەشەسەندنی ئابووری و گۆڕانی کەشوهەوا دەبێتە هۆی توندبوونەوەی فشاری ئاو.
