ئاژانسی ئەوروپا بۆ پاسەوانیی سنوور و كەناراوەكان (فرۆنتكس) دەڵێت، ژمارەی كۆچبەرانی نایاسایی كە بەرەو وڵاتانی یەكێتیی ئەوروپا و بەتایبەتیش ئیتاڵیا دەپەڕنەوە زۆر زیادیكردووە.
ژمارەی ئەو كۆچبەرە نایاساییانەی بەرەو سنوورەكانی یەكێتیی ئەوروپا لەمساڵدا تا كۆتایی تەمموزی رابردوو پەڕیونەتەوە گەیشتووەتە 176 هەزار و 100 كەس، زۆرینەیان لەڕێی دەریای سپیی ناوەڕاستەوە پەڕیونەتەوە.
بەپێی دوا ئامارەكانی ئاژانسی ئەوروپا بۆ پاسەوانیی سنوور و كەناراوەكان (فرۆنتكس) ژمارەكەی ئەمساڵ زیاترە لە ژمارەی هەمان ماوەی ساڵی 2016. تەنها لەمانگی رابردوودا 42 هەزار و 700 كۆچبەری نایاسایی خۆیان گەیاندووەتە سنوورەكانی یەكێتییەكە كە دەكاتە زیادبوون بەڕێژەی 19% بەراورد بە هەمان ماوەی ساڵی 2022.
ناوچەی ناوەڕاستی دەریای سپیی ناوەڕاست زۆرترین ژمارەی كۆچبەرانی پیاتێپەڕیووە كە 89 هەزار و 74 كەسە. كۆچبەران بە بەلەم لە كەناراوەكانی تونس و لیبیاوە روو لە دوورگەكانی ئیتاڵیا دەكەن.
ئەمەش لەكاتێكدایە بەپێی ئاژانسە ئەوروپییەكە رێگەكە مەترسیدارترینە بۆسەر ژیانی كۆچبەران، تەنها لەمساڵدا و تا مانگی رابردوو هەزار و 800 قوربانی تۆماركردووە.
هەروەك بەدووریشی نازانێت لە مانگەكانی داهاتوودا فشارەكانی سەر رێگاكە زیاتربن.
