لیژنەی پەیوەندییەکانی ئەنجومەنی نوێنەرانی عێراق میوانداریی دەستەی ئیدارەی کۆمپانیای کۆڕەک دەکات و هۆکارەکەشی ئاشکرا دەکات، سەبارەت بە کارەکانی کۆمپانیاکە و ئەو ئەرکانەی لەسەریەتی.
بەپێی نوسراوێکی سەرۆکی لیژنەی پەیوەندییەکانی ئەنجومەنی نوێنەرانی عێراق، ئەمڕۆ دووشەممە لیژنەکە میوانداری دەستەی ئیداریی کۆمپانیای کۆڕەک دەکات، بەمەبەستی بەدواداچوون بۆ سەرجەم پابەندی و ئەرکەکانی سەر کۆمپانیای کۆڕەک تیلیکۆم و جێبەجێکردنی ئەو پابەندییانە.
پێشتر کاروان عەلی ئەندامی لیژنەی پەیوەندییەکانی ئەنجومەنی نوێنەرانی عێراق رایگەیاند، “حکومەت قەرزێکی زۆری لەسەر کۆمپانیاکانی پەیوەندیکردن هەیە و کۆڕەک تیلیکۆمیش گەورەترین رێژەی قەرزی کەڵەکەبووی لەسەرە”.
ئاماژەی بۆ ئەوە کردووە کە لیژنەکەیان بە هەماهەنگی لەگەڵ وەزارەتی پەیوەندییەکانی عێراق پێداچوونەوە بۆ قەرزی سەر کۆمپانیا دەکەن و کاری جدییش لەبارەی ئەو بڕیارە دەکەن کە کۆمپانیاکانی پەیوەندیکردن پابەند دەکات بە دانەوەی قەرزەکان و لەناویشیاندا کۆڕەک تیلیکۆم.
