بەریتانیا و ئەوروپا هەریەکێکیان لای خۆیانەوە ڕێککەوتنیان لەسەر ئاڵوگۆڕی بازرگانی نێوانیان ڕاگەیاند و بەریتانیا ڕێککەوتنەکەی بە هەواڵێکی خۆش ناوهێنا بۆ هاوڵاتییەکانی.
بوریس جۆنسون، سەرۆکوەزیرانی بەریتانیا لە کۆنگرەیەکی ڕۆژنامەوانیدا ئێوارەی ئەمڕۆ 24 ی کانونی یەکەم، ڕایگەیاند، “ئەوەی بەڵێنەی کە ساڵی 2016 دا بە بەریتانییەکان درا لە دوای ڕیفراندۆمی جیابوونەوە لە ئەوروپا ئێستا هاتە دی”.
جۆنسون ڕاشیگەیاند، “لەگەڵ ئەوروپا لەبارەی بەهای درا و یاساکانی بازرگانی و ئاڵوگۆڕی شمەک گەیشتینە ڕێککەوتن”.
ئورسولا ڤۆندێرلاین، سەرۆکی کۆمسیۆنی یەکێتی ئەوروپا لە کۆنگرەیەکی ڕۆژنامەوانیدا لەسەر هەمان پرس ڕایگەیاند، “لە ڕێککەوتنەکەدا لەگەڵ بەریتانیا ڕێزی تەواو بۆ یاسا بنەڕەتییەکانی ئەوروپا دانراوە و لە ئایندەدا لایەنە ئەرێنییەکانی ڕێککەوتنەکە دەبینرێت”.
The deal is done. pic.twitter.com/zzhvxOSeWz
— Boris Johnson (@BorisJohnson) December 24, 2020
سەرۆکی کۆمسیۆنی یەکێتی ئەوروپا ڕاشیگەیاند، “لەگەڵ بەریتانیا هەماهەنگی تەواو دەبێت لەسەر گۆڕانکارییە ناوچەییەکان و شێوازی گواستنەوەی شمەک و لایەنی ئەمنی هەردوولا.
ڤۆندێرلاین بەریتانیای بە دۆستێکی دێرین و هەمیشەیی ناوهێنا و ئامادەی یەکێتی ئەوروپای بۆ هاوکاری ئەو وڵاتە ڕاگەیاند.
لە ساڵی 2016 وە بەریتانییەکان ڕیفراندۆمیان بۆ جیابوونەوە لە یەکێتی ئەوروپاکرد و زۆرینەی دەنگیان بە جیابوونەوەدا، دوای چوار ساڵ لەو دەنگدانە ئەمڕۆ هەماهەنگی نێوان هەردولا بە ڕێککەوتنێک ڕاگەیەنرا.
