بەپێی ئەو زانیارییانەی لە یەكێك بەڕێوەبەرایەتییەكانی گەنجینەی سلێمانییەوە بە تۆڕی میدیایی ئێستا دراون، دەستكراوە بە وەرگرتنی لیستی مووچەی مانگی 7 لە فەرمانگەكان و هەر كاتێك وەزارەتی دارایی داوای لیستەكان و بڕی پارەی پێویست بكات بۆی ئامادەدەكرێت.
هەر بەپێی زانیارییەكان، تائێستا لە وەزارەتی داراییەوە داوای بڕی پارەی تەرخانكراوی فەرمانگەكان نەكراوە كە مانگانە پێشوەختە داوای بڕە پارەی پێویست بۆ مووچەی فەرمانگەكان لە بەڕێوەبەرایەتیی گەنجینەكان دەكرێت، هەرچەندە بەشێكی فەرمانگەكان مووچەی مانگی حوزەیرانیان وەرنەگرتووە چاوەڕوانی مووچە دەكەن.
شەوی رابردوو پێشەوا هەورامانی وتەبێژی حكومەتی هەرێم لە كۆنگرەیەكی رۆژنامەوانیدا رایگەیاند، رێنماییەكانی تایبەت بە یاسای بودجە بڵاوكراوەتەوە و یاسای بودجە خراوەتەوە بواری جێبەجێكردنەوە و چاوەڕواندەكرێت پشكی هەرێم لەلایەن بەغدادەوە رەوانەبكرێت و هەر كات پشكی هەرێم نێردرا كاری لە پێشینەی حكومەت دابەشكردنی مووچەی فەرمانبەرانە و هیچ بیانوویەك نەماوە بۆ ئەوەی مووچەی فەرمانبەران رەوانە نەكرێت.
ئێوارەی ئەمڕۆش سۆران عومەر ئەندامی ئەنجومەنی نوێنەرانی عێراق رایگەیاند، یاسای بودجە خراوەتە بواری جێبەجێكردنەوە و پێویستە لەدوای 15ی مانگەوە پشكی هەرێم رەوانە بكرێت و ئەگەر نەنێرێت پێشێلكردنی یاسایە و ئێمە قبووڵی ناكەین.
