لە رووداوێكی هاتوچۆدا لە سلێمانی مامۆستایەكی زانكۆ كە كوڕی شەهیدێكی سەركردەی یەكێتییە گیانیلەدەستدا.
رووداوەكە بەرەبەیانی ئەمڕۆ لەسەر رێگای سەرەكی نێوان تونێلی پێشڕەو و جوت سایدی هەواری شار لە سلێمانی بووە.
سامان نادر، بەڕێوەبەری فریاکەوتنی خێرای سلێمانی بە تۆڕی میدیایی ئێستای راگەیاند، رووداوەكە لە جۆری وەرگەڕان بووە و تیایدا كەسێك گیانیلەدەستداوە و شۆفێری ئۆتۆمبێلەكەش برینداربووە.
قوربانییەكە (کاروان عەلی شامار)ە كە مامۆستای زانكۆ و كوڕی وەسفییە بەنی وەیس، شەهیدی سەركردە و عەلی شامار، تێكۆشەری دێرینی یەكێتی-یە.
بەپێی زانیارییەكان ئۆتۆمبێلەكە لە جۆری مارسیدس بووە، برینداری رووداوەكە شۆفێری ئۆتۆمبێلەكە و ئاوەڵزاوای قوربانییەكەیە و لە ناوچەی سیتەك لە سلێمانی گەڕاونەتەوە و، بەر لە گەیشتنەسەر شەقامی هەواری شار كۆنتڕۆڵی لەدەستداوە و وەرگەڕاوە، ئەمەش لە زاری كەسوكاری قوربانییەكەوە دووپاتكراوەتەوە.
