پۆلیسی سلێمانی بڵاویکردەوە کە سێ کەسیان دەستگیرکردووە بەتۆمەتی دزیکردن لە نووسینگەیەکی حەواڵەی دراو، دەستیشگیراوە بەسەر بڕی 40 ملیۆن دیناردا.
لە راگەیەندراوێکدا بەڕێوەبەرایەتیی گشتیی پۆلیسی سلێمانی ئاشکرایکرد، لە کاتی گەڕان و بەدواداچوونی مەفرەزانیاندا لەناو بازاڕدا، توانراوە سێ تۆمەتبار لەساتی بڕینی نووسینگەیەکی حەواڵەی دراودا دەستگیربکەن.
ئاماژە بۆ ئەوەشدەکات کە لە کاتی دەستگیرکردنیاندا دەستگیراوە بەسەر بڕی 40 ملیۆن دینار و ژمارەیەک کارتی پەیوەندیکردن و کارتی ئینتەرنێتدا.
بەپێی راگەیەندراوەکە، لە لێكۆڵینەوەكاندا دەركەوتووە كە منداڵێكی خاوەن نوسینگەكە هاوكاری تۆمەتباران بووە بۆ بڕینی نوسینگەكە .
لەئێستادا هەرسێ تۆمەتبار، م،ك،ر لەدایكبووی 1986، پ،ر،ع لەدایكبووی 2001، ر،ع،ع لەدایكبووی 2001 بەپێی ماددەی 443 لەیاسای سزادانی عیراقی ڕاگیراون و لێكۆڵینەوە لەگەڵیاندا بەردەوامە.
