کۆنترۆڵی جۆریی دەرمانی هەرێمی کوردستان ئاشکرایکرد، ئەو جۆرە دەرمانەی بەناوی “کۆڵد ئاوت” کە کۆمپانیایەکی هیندی بەرهەمی دەهێنێت و دەوترێت ژەهراوییە، مۆڵەتی فەرمیی هاوردەکردنی هەبووە.
لە راگەیەندراوێکدا کە وەزارەتی تەندروستیی هەرێمی کوردستان بڵاویکردووەتەوە بڵاویکردەوە، “دوای بەدواداچوونی وردی زانستی و پیشەییانەی خۆمان بۆ هاوڵاتییانمان روونیدەکەینەوە کەوا دەرمانەکە بە شێوەیەکی فەرمی هاوردەی هەرێمی کوردستان کراوە و هەڵسەنگاندنی تاقیگەیی بۆ ئەنجامدراوە و کارگەی بەرهەمهێن تۆمارکراوە لە بەڕێوەبەرایەتییەکەمان”.
ئاماژە بە پشکنینەکانی ئاژانسی بلومێرگ دەکات کە ئەنجامەکەی ژەهراویبوونی دەرمانی کۆڵد ئاوت پشتڕاستدەکاتەوە و دەڵێت، “ئەو نموونانەی کە ئاژانسی ( Bloomberg) لە راپۆرتەکەی ئاماژەی پێکردووە کە گوایە هەڵسەنگاندنی تاقیگەیی بۆ ئەنجامدراوە، تەنها لەشاری بەغداد وەرگیراون و لە هەرێمی کوردستان تاوەکو ئێستا دەرمانەکە هیچ کاریگەرییەکی لاوەکی نەبووە”.
روونیدەکاتەوە کە بۆیە بۆ دڵنیابوونەوە لە سەلامەتی دەرمانەکە و پاراستنی تەندروستیی هاوڵاتییان ئەو بڕیارانەمان دەرکرد:
١- راگرتنی مامەڵەکردن و بەکارهێنانی دەرمانەکە.
٢- راکێشانەوەی ( Recall) هەموو ئەو ژمارە باجانەی کە لە بازاڕەکانی هەرێمی کوردستاندا بوونیان هەیە.
٣- هەڵپەساردنی کارگەی بەرهەمهێنەر و راگرتنی هاوردەکردنی بەرهەمەکانی کارگەکە تا دەرچوونی ئەنجامی کۆتایی لێکۆڵینەوە.
لە راگەیەندراوەکەدا هاتووە، “بەڕێوەبەرایەتیی کۆنتڕۆڵی جۆریی دەرمان دڵنیایی تەواو دەداتە هاوڵاتییانمان لە کوردستان کە بەردەوام لە بەدواداچوونی ورد و زانستییانەدایە سەبارەت بەم بابەتە لە ناو دەرمانخانە و کۆگاکانی دەرمان بە مەبەستی دابینکردنی دەرمانی سەلامەت و کوالێتیی بەرز و بنبڕکردنی دەرمانی بێ سەرچاوە و قاچاخ”.
