ئیدارەی راپەڕین رایدەگەیەنێت، دەروازەی سنووریی كێلێ فراواندەكرێت و پرۆژەكانی سنوورەكەش ئاشكرادەكات.
ئیدارەی سەربەخۆی راپەڕین رایگەیاند، كاركردن بۆ فراوانكردنی دەروازەی كێلێ دەستیپێكردووە و بۆ ئەو مەبەستەش هیوا قەرەنی، سەرپەرشتیاری ئیدارەی سەربەخۆی راپەڕین بە یاوەری جێگری سەرپەرشتیار بۆ کاروباری هونەری سەردانی دەروازەكەی کرد و لە گرفت و کێشەکانی کۆڵییەوە.
ئاشكراشیكرد، لەئێستادا بینا بۆ نشینگە، ئاسایش، پۆلیس و بنکەی گومرگی دروستدەکرێت.
بە تەواوبوونیان خزمەتێکی زۆر باش بە هاوڵاتییانی سنوورەکە و کوردستان دەگەیەنێت، وەك ئەوەی ئیدارەی راپەڕین ئاماژەی پێداوە.
كێلێ یەكێكە لە دەروازە سنوورییەكانی نێوان هەرێمی كوردستان و رۆژهەڵاتی كوردستان و ئێران و رۆژانە نزیكەی 200 بارهەڵگر خۆراك، كەرەستەی بیناسازی و پیشەسازی لەوێوە هاوردەی هەرێمی كوردستان و عێراق دەكرێن.
لە سەرەتای مانگی ئازاری رابردووشەوە بە هەوڵی قوباد تاڵەبانی جێگری سەرۆك وەزیران، هاتوچۆی گەشتیاری لە دەروازەكەوە دەستیپێکردووە و هاوڵاتییانی هەرێمی كوردستان دەتوانن لەو رێگەیەوە سەردانی رۆژهەڵاتی كوردستان و ئێران بكەن.
